لاہور(پنجاب پوسٹ) وفاقی تحقیقاتی ادارے (ایف آئی اے) اینٹی کرپشن سرکل لاہور نے افغان شہریوں کو غیر قانونی طور پر پاکستانی شناختی کارڈ جاری کرنے کے الزام میں نادرا کے سینئر ایگزیکٹو محمد عمران اللہ اور ڈیٹا انٹری آپریٹر ثاقب زاہد ملک کو گرفتار کر لیا ہے۔ ایف آئی اے کے مطابق تحقیقات میں نادرا اہلکاروں اور ایجنٹس کے مبینہ گٹھ جوڑ کا انکشاف ہوا ہے۔
گرفتاریوں کی تفصیل
ایف آئی اے کے مطابق ملزم محمد عمران اللہ کو ارفع کریم ٹاور لاہور میں واقع نادرا کے خدمت مرکز سے گرفتار کیا گیا۔ نادرا میگا سینٹر شملہ پہاڑی کے ڈیٹا انٹری آپریٹر ثاقب زاہد ملک کو بھی حراست میں لیا گیا ہے۔
ایجنٹس کی پہلے گرفتاری
ایف آئی اے نے اس کیس میں ایجنٹس رانا محمد اکرام اور محمد شاہد کو اس سے قبل ہی گرفتار کر لیا تھا۔
ایف آئی اے کا مؤقف
ایف آئی اے کے مطابق گرفتار نادرا اہلکاروں نے ایجنٹس سے رشوت وصول کر کے افغان شہریوں کو پاکستانی شناختی کارڈ جاری کیے۔ ادارے کا کہنا ہے کہ معاملے کی مزید تحقیقات جاری ہیں۔














