لاہور (پنجاب پوسٹ) اداکارہ زرین کی درخواست پر تھانہ ڈیفنس سی میں تشدد اور دھمکیاں دینے کے الزام میں مقدمہ درج کرلیا گیا۔ ایس پی کینٹ عاطف امیر کی ہدایت پر ڈیفنس پولیس نے فوری کارروائی کرتے ہوئے مقدمے میں نامزد مرکزی ملزمہ کوکب نواز کو گرفتار کرلیا۔
پولیس کے مطابق درخواست گزار اداکارہ زرین نے نامزد افراد حارث اور کوکب نواز پر جسمانی تشدد اور دھمکیاں دینے کے الزامات عائد کیے تھے۔
یہ بھی پڑھیں: اداکارہ ہراسانی کیس، کیا ثاقب چدھڑ کو مقدمے سے بری کردیا گیا ہے؟
پولیس نے ملزمان کے خلاف مقدمہ نمبر 2167/26 درج کیا ہے، جس میں تعزیرات پاکستان کی دفعات 354 اور 506 شامل کی گئی ہیں۔
گرفتار ملزمہ کو مزید تفتیش کے لیے انویسٹی گیشن پولیس کے حوالے کردیا گیا ہے، جبکہ دیگر نامزد ملزمان کی گرفتاری کے لیے پولیس ٹیم تشکیل دے کر چھاپے مارے جا رہے ہیں۔
ایس پی کینٹ عاطف امیر کا کہنا ہے کہ دیگر ملزمان کو بھی جلد گرفتار کرلیا جائے گا۔ قانون ہاتھ میں لینے والے عناصر کسی رعایت کے مستحق نہیں۔
