مری کو اسلحہ سے پاک کرنا مشن ،غیر قانونی اسلحہ کے حامل افراد ایک ہفتے میں ہتھیار جمع کروائیں ، ڈی پی او مری رضا تنویر سپرا

مری ( پنجاب پوسٹ ) ڈی پی او مری رضا تنویر سپرا نے کہا ہے کہ ملکہ کوہسار کو اسلحہ سے پاک کرنا ان کا مشن ہے ، جن افراد کے پاس غیر قانونی ہتھیار ہیں وہ ایک ہفتے میں جمع کروا دیں ۔ جناح ہال مری میں میڈیا نمائندگان کے ساتھ پریس کانفرنس کرتے ہوئے ضلع مری میں امن و امان کی صورتحال، جرائم کے خلاف کارروائیوں اور آئندہ لائحہ عمل کے حوالے سے تفصیلی بریفنگ دی۔
پریس کانفرنس کے دوران ڈی پی او مری نے غیر قانونی اسلحہ کے خلاف زیرو ٹالرنس پالیسی کا اعلان کرتے ہوئے سختی سے ہدایات جاری کیں کہ ضلع بھر میں ناجائز اسلحہ رکھنے والوں کے خلاف بلا امتیاز کارروائی عمل میں لائی جائے گی اور مری کو اسلحہ سے پاک کیا جائے گا۔
ڈی پی او مری نے اہلیانِ مری سے اپیل کی کہ جن افراد کے پاس غیر قانونی اسلحہ موجود ہے وہ ایک ہفتے کے اندر اندر اپنے متعلقہ تھانہ کے ایس ایچ او کے پاس جمع کروا دیں، بصورت دیگر مقررہ مدت کے بعد سخت قانونی کارروائی عمل میں لائی جائے گی۔
ڈی پی او مری نے شہریوں سے مطالبہ کیا کہ وہ اپنے اردگرد موجود غیر قانونی اسلحہ رکھنے والے افراد کی نشاندہی کریں تاکہ بروقت کارروائی کر کے معاشرے کو اس ناسور سے پاک کیا جا سکے۔ رضا تنویر سپرا کے مطابق ضلع مری میں امن و امان کے قیام اور شہریوں کے جان و مال کے تحفظ کے لیے ہر ممکن اقدامات کیے جائیں گے اور کسی بھی قسم کی خلاف ورزی برداشت نہیں کی جائے گی