لاہور (پنجاب پوسٹ) رائیونڈ میں عالمی سالانہ تبلیغی اجتماع کے دوسرے مرحلے کا باقاعدہ آغاز کل سے ہوگا۔ اس حوالے سے اسسٹنٹ کمشنر رائیونڈ رائے بابر کی زیرِ صدارت تمام متعلقہ سرکاری اداروں کے سربراہان کا اہم اجلاس منعقد ہوا، جس میں اجتماع کے انتظامات اور تیاریوں کا تفصیلی جائزہ لیا گیا۔
اجتماع انتظامات پر بریفنگ اجلاس
اجلاس میں پولیس، ریسکیو 1122، واپڈا، لاہور ویسٹ مینجمنٹ کمپنی (LWMC)، میونسپل کارپوریشن لاہور (MCL) سمیت تمام متعلقہ سرکاری محکموں کے سربراہان نے شرکت کی۔ اس موقع پر تمام اداروں کے نمائندگان نے اجتماع کے دوسرے مرحلے کے حوالے سے اپنی اپنی تیاریوں اور انتظامات پر اسسٹنٹ کمشنر رائیونڈ کو تفصیلی بریفنگ دی۔
اجلاس میں سیکیورٹی، ٹریفک مینجمنٹ، صفائی ستھرائی، بجلی کی بلا تعطل فراہمی، طبی سہولیات، ریسکیو سروسز اور دیگر انتظامی امور کا جائزہ لیتے ہوئے تمام انتظامات کو حتمی شکل دی گئی۔
بہترین سہولیات اور فول پروف سیکیورٹی کی ہدایت
اسسٹنٹ کمشنر رائیونڈ رائے بابر نے تیاریوں پر اطمینان کا اظہار کرتے ہوئے تمام محکموں کو ہدایت کی کہ اجتماع کے دوران زائرین کو بہترین سہولیات کی فراہمی، فول پروف سیکیورٹی اور تمام انتظامات کی مؤثر نگرانی کو ہر صورت یقینی بنایا جائے۔
