لاہور(پنجاب پوسٹ) لاہور ہائیکورٹ نے پنجاب یونیورسٹی کے ملازمین کو انکریمنٹ نہ دینے کے معاملے پر درخواستیں منظور کرتے ہوئے ملازمین کی انکریمنٹس بحال کرنے کا حکم دے دیا۔ کیس کی سماعت جسٹس شریں عمران نے کی۔
دورانِ سماعت درخواست گزار محمد یاسین وغیرہ کی جانب سے سپریم کورٹ کے وکیل آصف چھٹہ عدالت میں پیش ہوئے۔ وکیل نے مؤقف اختیار کیا کہ درخواست گزاروں کو ترقی دے کر اسسٹنٹ رجسٹرار بنایا گیا تھا، تاہم یونیورسٹی انتظامیہ نے ان کی پری میچور انکریمنٹس منہا کر لیں۔
وکیل نے عدالت کو بتایا کہ ایک مرتبہ سرکاری ملازمین کو انکریمنٹ کی صورت میں مالی فائدہ دے دیا جائے تو اسے واپس نہیں لیا جا سکتا۔ انہوں نے استدعا کی کہ ملازمین کی جاری کردہ انکریمنٹس بحال کرنے کا حکم دیا جائے۔
عدالت نے ریمارکس دیے کہ انکریمنٹ کی صورت میں ملازمین کو جو فائدہ دے دیا جائے، وہ واپس نہیں لیا جا سکتا۔ بعد ازاں عدالت نے درخواستیں منظور کرتے ہوئے ملازمین کی انکریمنٹس بحال کرنے کا حکم دے دیا۔
